|
Ministri malazez Branimir Gvozdenoviç, në cilësinë e kryesuesit të sekretarit të CEFTA-s, i shkruan MTI-së se Kosova në këtë asociacion nuk mund të prezantohet pa UNMIK-un dhe nuk ka arsye që të debatohet për bllokadën e mallrave kosovare nga Serbi e Bosnja. Qeveria e Kosovës ende nuk e ka gati përgjigjen.
Mali i Zi, pasi e pranoi Kosovën si shtet të pavarur, me veprimet e mëvonshme dëshmon sikur lëkundet drejt thellimit të bashkëpunimit dhe të ndihmës.
Kjo po vërehet edhe përmes pengesave që i bën Kosovës në asociacionet ekonomike rajonale e evropiane. Gazeta “Express” mëson se ministri i Ekonomisë së Malit të Zi, Branimir Gvozdenoviç, njëherësh kryesues i sekretariatit të CEFTA-s, të hënën, i ka shkruar një letër ministrit të Tregtisë dhe Industrisë së Kosovës, Lutfi Zharkut, me të cilën thotë se Kosova nuk mund të përfaqësohet pa UNMIK-un në takimin e së martës të sekretariatit të këtij asociacioni në Bruksel.
Këtë e ka konfirmuar edhe zëvendëskryeministri i Kosovës, Hajredin Kuqi, i cili nuk ka dashur të komentojë për vendimet që do të merr Qeveria e Kosovës lidhur me këtë rast. “Ne e kemi marrë këtë letër dhe do të konsultohemi me institucionet vendore dhe ndërkombëtare për të dalë me një qëndrim”, ka pohuar Kuqi.
Zekirija Shabani
Express |
