| BAHRI HAXHA- emër që nderon shkollën dhe Drejtorinë Arsimore të Vushtrrisë |
| Publikuar më 23 janar, 2010 në orën 16:49 ( ) |
Prof. Bedri Tahiri | Histori | |
|
|
|
Vushtrri, e mërkurë 20 janra 2010
Sot, që pa aguar mirë, Shkolla e Mesme Profesionale në Vushtrri që stolisur si nuse e vërtetë. Dhe, kishte të drejtë. Ajo sot kishte dy festa të mëdha: përurohej meremetimi i saj dhe pagëzohej me emrin e ri të dëshmorit dhe intelektualit Bahri Haxha, i cili edhe vetë, në kohën më të vështirë mu këtu kishte shpërndarë dritën e diturisë.
Në orën 11 oborri i saj gumëzhinte si zgjua bletësh. Nxënës, prindër, mësimdhënës, qeveritarë, deputet, ministra, komandantë, luftëtarë, familjarë dëshmorësh dhe mysafirë të shumtë me padurim prisnin fillimin e ceremonialit. Fjala e drejtorit të shkollës, z. Besim Musliu, u përcoll me duartrokitje të fuqishme...
Edhe pse meremetimi dhe paisja me mjete me moderne e shkollës nga donacionet e DANIDA e Suedisë dhe nga MASHT-i e nga Komuna, qe një gëzim i madh për të gjithë, emërtimi i saj ngjalli ndjenja dhe emocione më të veçanta. Dëshmori Bahri Haxha duhet të jetë shembull për nxënësit dhe kolektivin e shkollës, - tha pos tjerash kryetari i komunës, z. Bajram Mulaku. Ndërkaq, drejtori i DKA-së, z. Qerim Selimi fjalën e tij e përmbylli me fjalinë: Drejtoria e shkollës dhe Drejtoria Arsimore e Vushtrrisë e kanë për nder që sot e tutje Shkolla e Mesme Profesional mban emrin e profesorit, intelektualit, atdhetarit dhe dëshmorit BAHRI HAXHA.
Në emër të familjes Haxha foli Prof. Dr. Shyqyri Haxha, i cili tha se ata që nderojnë dëshmorët nderojnë veten dhe pasi i falënderoj të gjithë ata që kontribuan për emërtimin e shkollës me emrin e dëshmorit Bahri Haxha, nxënësve dhe mësimdhënësve u dëshiroj suksese dhe përparime në procesin mësimor. Pllakën e zbuluan kryetari Bajram Mulaku, babai i dëshmorit Rexhep Haxha dhe drejtori i Drejtorisë Arsimore Qerim Selimi.
Dëshmori Bahri Rexhep Haxha (1972- 1999)
Gjatë luftës sonë të fundit çlirimtare, që e zhvilluan trimat e Ushtrisë Çlirimtare të Kosovës, pati ngjarje dhe data, të cilat janë ngulitur thellë në kujtesën tonë historike. E tillë është edhe ajo e 2 majit 1999, ku u martirizua edhe intelektuali i shquar, organizatori dhe promotori i Lëvizjes studentore, edukatori sypatrembur, inxhinieri shembullor i informatikës dhe veprimtari sypatrembur i sektorit më të ndjeshëm të UÇK-së- Logjistikës, Bahri Rexhep Haxha (1972- 1999).
Trung i lashtë trimërie
Në Manzën e Poshtme të Vushtrrisë (ish Sfaraçaku i Poshtëm), jeton edhe familja Haxha, e cila vjen nga Galica heroike, emri i së cilës ia kishte futur dridhjet në shtat kralit serb në Beograd. Krah për krah me kryetrimin Azem Galica ishte edhe Vesel Haxha- Galica, i cili u dallua edhe në Brigadën e tribunit Shaban Palluzha.
Në gjirin e kësaj familjeje me traditë, u lind edhe Bahri Haxha. Prindërit e tij; Rexhepi dhe Halimja nga Klina e Epërme e Skënderajt, patën dymbëdhjetë fëmijë, gjashtë djem: Shyqyriun, Bakiun, Bahriun, Veselin, Artanin, Adnanin dhe gjashtë vajza: Zahiren, Fatmiren, Zahiren, Feriden dhe Mevlyden.
Bahriu erdhi në këtë botë më 3 shkurt 1972. Qysh herët u hetua se ishte natyrë e zgjuar dhe dispononte inteligjencë që nuk përkonte me moshën e tij. Madje edhe fizikisht ishte mjaft i shkathët dhe i fuqishëm. Rrëfimet e burrave, për trimat e vendit dhe luftërat tona shekullore, i përcillte me vëmendje të shtuar. Ato ia shtonin kureshtjen për të ditur edhe më shumë dhe ia sforconin ndjenjën e pastër të atdhetarisë. Kur vajti në shkollë, në Nedakofc, që në fillim u dallua për të mirë. I urtë, i sjellshëm, i dashur dhe mbi të gjitha i zgjuar. Mësimet i përpinte, siç i thonë një fjale. Lexonte shumë, çka i binte në dorë, ama më shumë i pëlqenin librat ku flitej për luftërat, për heronjtë, për Kosovën, për Shqipërinë.
Qysh në klasën e pestë të shkollës fillore “Ali Kelmendi” në Vushtrri, kishte vizatuar hartën e Shqipërisë Etnike dhe e kishte vënë në ballë të klasës. Për këtë veprim të “ndaluar”, bashkimin e Kosovës me Shqipërinë, ai u ndëshkua me parapërjashtim, ndërsa i ati, Rexhepi, u mor në biseda informative, siç i quanin politikanët mediokër të kohës zezonë, thirrjet në polici, ku përjetoi maltretime të shumta psikike e fizike.
I tillë ishte edhe gjatë shkollimit të mesëm, në QMSH “Muharrem Bekteshi” në Vushtrri, ku më 1991, mori diplomën në drejtimin më të vështirë të asaj kohe; matematikor- natyror (Programer), me sukses të shkëlqyeshëm.
Në rrethimin e parë të Adem Jasharit
Me të mbaruar shkollimin e mesëm, Bahriut i vije ftesa për rekrutim në Ushtrinë Jugosllave.
-Jo, kurrë nuk i shërbej ushtrisë së një pushtuesi!- tha ai, duke e bërë ftesën copë- copë.
 Komandant Adem Jashari
Pas këtij veprimi të guximshëm duhej larguar paksa nga valët e stuhisë shkatërrimtare. Dhe, ku tjetër do të gjente strehim të sigurt, përveç në Drenicën e tij stërgjyshore! Disa ditë i kaloi në Galicë, të kushërinjtë e vet e pastaj edhe ta dajat, në Klinë të Epërme. Mu ato ditë, ishte fundi i vitit 1991, u sulmua komandanti i Ushtrisë Çlirimtare të Kosovës, Adem Jashari. Ishte ky sulmi i parë i 31 dhjetorit 1991. Kur u mobilizuan drenicarët për t’i vajtur në ndihmë familjes Jashari dhe komandantit të tyre, edhe Bahriu u gjend në mesin e atyre që kishin ndarë mendje ta bënin vdekjen si me le. Për fat, forcat serbe kishin nuhatur situatën dhe ishin tërhequr me bisht nën këmbë...
Sidoqoftë, kjo qe një ngjarje që në shpirtin e djaloshit bëri kthesë të madhe, duke ia sforcuar edhe më idealin për agun e shpejtë të ditës së bardhë...
Studenti shembullor
Më vonë, Bahri Haxha filloi studimet në Fakultetin e Elektroteknikës- drejtimi i Informatikës, në Prishtinë. Provimin pranues e kishte dhënë me sukses të kënaqshëm, duke zënë kryet e ranglistës. Krahas mësimeve ai kryente edhe detyra të tjera në aktivitete politike e organizative studentore. Ishte në bashkëpunim të ngushtë me Unionin e Pavarur të Studentëve të Prishtinës.
 Bahri Haxha, student
Ai, në bashkëveprim me të vëllain, Shyqriun, i cili ishte në krye të Unionit dhe me veprimtarin, tashmë dëshmorin, Mehë Uka, kishin marrë përsipër detyra me peshë kombëtare.
Por, as UDB-ja jugosllave nuk flinte. Kukudhat e saj i kishin rënë në gjurmë aktiviteteve të tij atdhetare. Dhe, në tetorin e vitit 1997, e arrestojnë në Prishtinë, duke e maltretuar e duke e kërcënuar, me qëllim frikësimi. Por, kot. Ai me kohë ishte përcaktuar në rrugën e lirisë.
Bahriu, edhe në demonstratat që u organizuan kundër mbylljes së Universitetit të Prishtinës, qe mjaft i zëshëm. Ai, ishte për vazhdimin e mësimit nëpër shtëpi private. Këmbëngulësia e tij me shokë, duke bërë thirrje edhe përmes valëve të Radio Zagrebit (emisionit në gjuhën shqipe), dha rezultate pozitive. Mësimet, përkundër vështirësive të shumta, zhvilloheshin për lakmi. Edhe gjatë demonstratave të mëdha studentore, të vitit 1998, Bahri Haxha ishte në radhët e para.
Viti 1998, për studentin shembullor qe i mbarë. Atë vit mori diplomën e Inxhinierit të Informatikës dhe u martua me Naimen nga Suma, të cilës, shpeshherë i kishte thënë: të mora në qafë, sepse unë do të bie në këtë luftë. Pra, kishte parandjenjën e vetëflijimit për atdhe. Megjithatë në fletoren e tij edhe sot ruhet fjalia e shkruar me dorë: ”Herët a vonë, do të vijë liria!”.
Edukator i brezit të ri
Kur dhuna serbe ishte shtuar mbi arsimin shqip dhe kur disa, kishin zënë të largoheshin nga ajo detyrë e shenjtë, Bahri Haxha, sypatrembur e entuziast i pashoq, rroku ditarin dhe u mishërua me edukimin e brezit të ri. Nuk deshi t’ia kthej shpinën Kosovës në këto orë të liga, andaj u punësua në SHMT në Vushtrri. “I gjallë nuk do ta lëshoj Kosovën. Ky është vendi ku edhe dua të vdes!”- ngulte këmbë, kur ia përmendnin largimin nga atdheu.
Profesori i ri, nuk kënaqej vetëm me mësimdhënie. Ai kishte rënë në kontakte me UÇK-në dhe ishte vënë në dispozicion të saj moralisht, materialisht e fizikisht. Me të formuar të celulave të para edhe në Shalë, ai ishte lajmëruar në Shtabin e Batalionit IV të UÇK-së në Ceceli, te komandant Gani Imeri. Ai, duke e vërejtur se trimi vinte nga një familje me tradita të shkëlqyera atdhetarie e trimërie dhe duke i parë aftësit e tij organizative e profesionale, u konsultua edhe me drejtues të tjerë të luftës dhe, pa u hamendur, e caktuan në sektorin më të ndjeshëm të Ushtrisë Çlirimtare të Kosovës, në Logjistikë. Aty ai duhej, ku mund të kontribuonte më së shumti, gjykuan ata. Dhe, nuk kishin gabuar fare. Puna e tij në terren kishte bërë të veten. Dashuria e popullit për luftëtarët e lirisë shtohej dita- ditës saqë po shndërrohej në ideal të pashuar jetësor. Edhe radhët e vullnetarëve për t’i rrokur armët çlirimtare, nuk kishin të sosur, madje as armë nuk kishte për të gjithë.
Në atë drejtim i ndihmonin edhe vëllezërit e tij nga mërgata, sidomos Shyqriu, i cili ishte i lidhur drejtpërsëdrejti me Fondin “Vendlindja thërret” dhe me organizatorët e udhëheqësit e Ushtrisë Çlirimtare të Kosovës.
Bahriun më nuk mund ta kapnin dot. Ai ishte lart në male, atje ku shqipet e lirisë kishin hapur krahët dhe po i dilnin zot atdheut të sakatosur. “Bahriun e kishim përherë pranë vetes, në konsultime e në veprime. Sa e sa herë e rrezikoi veten për t’na sjellë ushqime, veshmbathje, barna, madje edhe municion të grumbulluar nga qytetarët,- përkujton sot me pietet të lartë komandanti i tij, Gani Imeri.
 Dëshmori Bahri Haxha
Ngjarjet rridhnin lumë. Ditën kur u sulmuan pozicionet e luftëtarëve të lirisë në majat e Shalës së Bajgorës, Bahri Haxha, u detyrua të bashkohet me familjen e vet dhe të përpiqet për ta shpëtuar nga më e keqja...
Një fund i tmerrshëm
E diela e 2 majit 1999 gdhiu ndryshe nga ditët e tjera. Orteku mbytës rrokullimë lëshohej tatëpjetës. Hakmarrje! Hakmarrje!- çirreshin e ulërinin djajtë shpirtnxirë e duarpërgjakur. Militarë e paramilitarë serboçetnikë, vërsulën mbi kolonën prej katërqind traktorësh e mijëra vetash midis dy Studimeve të Vushtrrisë. Bishat e egërsuara u ndalën edhe para traktorit të Bahriut. Familja e tij ngeli pa frymë. Të gjithë e dinin se djali i tyre ishte në listën e zezë të cerberëve të përtej Tunës. Motër Mevludja ia jep një çantë dhe i thotë shfrytëzoje rastin e ik kah të mundesh, por ai ia kthen: “Jo, jo, se mbase unë vritem e ju shpëtoni”.
Dhe, e identifikuan. Ata u gëzuan që më në fund e gjetën atë që po e kërkonin prej kohësh. As shuma e madhe e parave të plaçkitura atypari nuk ua zbutën zemrat të pashpirtëve. Sakaq ca krisma të mbytura i dhanë fund profesorit të nderuar.
- A ke çka bën tashti?- i thanë babë Rexhepit gjakatarët me krekosje prej të sëmuri histerik.
- Kaq patët mundësi, kaq bëtë more horra!- ua ktheu ai, që në ato çaste kishte ngelur i mpirë si mumie
Kasaphana vazhdoi edhe më derisa kaloi numri paraparë mbi njëqind...Trupi i pajetë i Bahriut, bashkë me të tjerët, varrosen nga pjesëtarët e Ushtrisë Çlirimtare të Kosovës në Studime, ndërkaq sot eshtrat e tij pushojnë të qetë në dheun e Kosovës së lirë, në Varrezat e Dëshmorëve në Bletajë..
Kujtimi për të nuk shuhet kurrë. Atë e kujtojnë nxënësit dhe kolegët, e kujton populli, e kujton Kosova, e kujton Shqipëria. Më mirë se gjetkë ai do të përkujtohet në vatrën e diturisë ku edhe vetë dha mësim, në Shkollën e Mesme Profesionale në Vushtrri, e cila tash e tutje me krenari do ta mbajë emrin “BAHRI HAXHA”.
Mbase, më së miri e kujton vetë familja e tij, e cila ndjehet krenare që pati një djalë të tillë, për ta nderuar vendin e atdheun. Rrugën e tij, në frontin e dijes, e vazhduan vëllezërit: Prof. dr. Shyqri Haxha, ligjërues në Universitetin e Kentit, i cili pos kontributit të madh intelektual e kombëtar, duke bërë përpjekje të vazhdueshme për aftësimin e kuadrove të reja nga Kosova, para ca muajsh u emërua Kryeshef Ekzekutiv i PTK-së; Vesel Haxha doktor shkence në Universitetin e Manqesterit; Artan Haxha- Galica, sportist i dalluar.
 Bahrije Haxha - bija e dëshmorit
Kjo, madje, edhe më mirë vërtetohet me vajzën e tij, Bahrijen, e cila edhe pse ka lindur në Londër të Anglisë, ku është edhe nxënësja më e mirë, Kosovën dhe UÇK-në i do shumë dhe mban në zemër.
- UÇK-ja është shpirti im!- u thotë ajo gjyshit e gjyshes, Rexhepit e Halimes, duke ua hequr mallin e djalit, të cilin e mbajnë thellë në zemër.
|
Vërëjtje: Artikujt e botuar në albaniapress.com nuk shprehin domosdoshmërisht mendimet e stafit moderues! |
| Vlerësimi juaj për lajmin |
 |
|
|
|
|
| I keq |
I dobët |
I mirë |
Shumë i mirë |
I mrekullueshëm |
|
|
|
|
|
|
|
| |
|
| Është vlerësuar nga 95 vizitorë |
| Lexuar:
6,970 herë
|
|
|
|
|
|
|
